​

Skjót staðfesting av sjúkuni er tí týdningarmesti faktorurin, tá effektiv viðgerð skal setast í verk, umframt at hetta minkar um møguligar skaðar og sjúkuárin annars. 

Granskingarúrslit vísa í fleiri førum, at tess skjótari sjúkan verður staðfest og rætta viðgerðin sett í verk, tess betri er úrslitið av viðgerðini. Harvið er vandin fyri kroniskari sjúkustøðu og tørvurin á heilivági minni. Skjót eyðmerking av sjúkuni merkir størri møguleika fyri at fáa giktasjúkuna at brenna út, soleiðis at viðgerðin við heilivági gerst óneyðug.

Eingin giktasjúka kennist eins og tí er altíð talan um serstakar viðgerðir. Strategisk giktaviðgerð er læknavísindalig sergrein, sum hevur verið fyri stórari menning seinastu tvey áratíggjuni og í dag finnast fleiri sløg av heilivági og samamsetingar av ymsum viðgerðarhættum.

​

Giktasjúkur kunnu ikki grøðast við medisinskari viðgerð, men sjúkan kann brenna út av sær sjálvum. Fokus er tí á avmarking av skaðiligum árinum av sjúkuni og betran av funktionellum evnum og lívsgóðsku.

Sostatt ber í dag til, at liva við gikt uttan invaliditet ella minkan av likamligum funktiónum.

Kostur og lívsstílur kunnu ávirka inflamatoriskan/reumatologiskan sjúkuaktivitet, men í fæstu førum slepst tó undan medisinskari viðgerð, sum hevur til endamáls at minka um brunan.